Бектеши: Млекото денес „падна“ на 76 денари, лебот на 36 денари

Министерот за економија Крешник Бектеши очекува до првата недела од декември да има дополнително намалување од 5 до 12 - 13 отсто на основните прехранбени производи.

Ако нема толкаво намалување во зависност од производите, секако дека ќе ги донесеме новите мерки кои се веќе подготвени од Министерството за економија. Тие се мерки кои што произлегуваат од Законот за трговија, рече Бектеши на денешната прес-конференција по средбата со компаниите за производство на храна.

Тој посочи дека веќе започнал трендот на намалување на цените на млекото и лебот.

Само еден пример, одреден производител на млеко имаше цена над 80 денари, денес е 76 денари и од 1 декември уште ќе паѓа цената. Одредени производители на леб имаа цени над 40 денари за лебот, денес се движат од 36 до 38 денари и таму очекуваме дополнително намалување. Истото важи и за месните производи, додаде Бектеши.