Сузана Јанкуловска Бицевска: Дигиталниот маркетинг добива се поголемо значење

Маркетинг-инвестиции треба да има секогаш, па  и во овој период. Меѓутоа тие се „осудени“ на реструктуирање, пренасочување, приспособување, зависно за кој бренд се работи и за кој канал производот е наменет.

Во разговорот со Сузана Јанкуловска Бицевска, директор за продажба и маркетинг во „АВТ Интернатионал“, Македонија, разговаравме за тоа како компанијата се справува со новонастанатата ситуација, меѓутоа и кои се клучните чекори во поглед на маркетинг и бренд-стратегиите.

Разговараше: Алма Растодер, alma@instore.mk

Како влијаеше пандемијата врз одделот за маркетинг и како го организиравте работењето во овој период?

Несомнено е дека пандемијата драстично ги измести сите текови на нашето секојдневно живеење и работење. Влијанието е големо во сите сегменти на работењето, па согласно тоа и во одделот за маркетинг.

Сепак, најголем императив за нас како компанија, а верувам и за сите други, е здравјето на  вработените, па и организирањето на работата во ова време на пандемија, го направивме во тој правец. Следејќи ги владините препораки, ги презедовме сите мерки за сигурно, здраво и непречено функционирање на секој сегмент во работењето.

Генерално, своето делување го префрливме и од нашите домови, за сите позиции за кои тоа не беше пречка.

Пандемијата и сите реперкусии кои таа ги донесе, нè исправи пред задача, брзо да се  приспособиме  на новонастанатата ситуација. Онлајн-состаноци со нашиот локален тим и со нашите партнери и принципали од странство ни станаа секојдневна практика.

Како и дa е, тимот е сплотен и е долги години заедно. Веќе сраснавме со брендовите кои ги развиваме, а и многу добро се познаваме. Сето тоа, секако, е значително олеснувачки фактор за сите нови предизвици со кои се соочивме.

Тимот е сплотен и е долги години заедно. Веќе сраснавме со брендовите кои ги развиваме, а и многу добро се познаваме. Сето тоа, секако, е значително олеснувачки фактор за сите нови предизвици со кои се соочивме.

Какви се вашите планови за комуникација со потрошувачите во овој период?

Потрошувачите се тие за кои брендовите постојат, па и сите стратегии низ годиниве, се планирале и постоеле за непречено одржување на таа комуникација.

Сепак, не верувам дека било која компанија можела однапред да ја предвиди пандемијата на Covid -19, па и однапред да испланира стратегија за ваква ситуација. Како и да е, довербата на потрошувачите не смее да се изневери, особено не во вакви времиња, па затоа направивме сè,  да останеме достапни за нив и во вакви услови.

Комуникацијата со потрошувачите ја продолживме пред сè директно, преку каналите на продажба кои останаа дозволени и отворени со новите владини мерки. Покрај тоа, би ги потенцирала социјалните мрежи и дигиталниот маркетинг кои се секако многу силно оружје, посебно во овој период, кога седејќи дома, потрошувачот може да дознае многу за производот, за местото на продажба, за промотивниот попуст, па и да си го нарача онлајн доколку сака.

Социјалните медиуми и дигиталниот маркетинг се многу силно оружје, особено во овој период, кога седејќи дома, потрошувачот може да дознае многу за производот, за местото на продажба, за промотивниот попуст, па и да си го нарача онлајн  доколку сака.

Претходното кризно искуство покажа дека инвестирањето во маркетинг во текот на овие периоди има значително влијание врз долгорочниот пораст и развој на компаниите. Каков е Вашиот став за ова прашање, кога станува збор за некои долгорочни ефекти и кои се вашите планови за создавање бренд-маркетинг во овој период и веднаш потоа?

Работиме на дистрибуција и развој на брендови кои се познати мултинационални имиња. Би било неискрено од нас да кажеме дека сме сосема независни во маркетинг-инвестирањата од нив, односно од сопствениците на брендот.  Ние сме продолжена рака на сопствениците на брендовите кои имаат свои глобални маркетинг-стратегии, а ние сме тука нив да ги адаптираме и реализираме на нашиот локален пазар. Сепак, нашиот генерален став е дека, маркетинг-инвестиции треба да има секогаш, па  и во овој период. Меѓутоа тие се „осудени“ на реструктуирање, пренасочување, приспособување, зависно за кој бренд/производ се работи и за кој канал производот е наменет.  На пр, каналот Хорека е комплетно затворен, па сите инвестиции однапред планирани за овој канал или ги откажавме, или ги префрливме за некој иден период. Меѓутоа, дел пренасочивме во поддршка на нашите деловни локални партнери кои изградија платформа за онлајн-продажба на производите кои главно се продавале во хорека. Слично е и со производите за декоративна козметика. Ретко кој се шминка за седење по дома, па и инвестициите за таквите брендови, се пролонгираа за летниот период, кога се надеваме дека ситуацијата ќе биде смирена. Социјалните мрежи се покажаа и тоа како важни за ваквите брендови, за разменување на потребни информации со потрошувачите односно пријателите на брендовите.

Помали предизвици за континуитетот во маркетинг-инвестициите имавме кај брендовите за лична и домашна хигиена, кои покрај храната, се најбараните производи од страна на нашите потрошувачи.

Меѓутоа факт е, дека одржување на маркетинг-комуникација со потрошувачот и во ваков период, и тоа како помага во одржувањето и развој на брендовите на долг рок, што се разбира влијае и на долгорочниот пораст на компаниите.

Кризата ни даде шанса да ја разбереме јачината на онлајн-продажбата, која станува неопходен канал и сè повеќе зема замав. Потребата од стратегија со која производот ќе се носи до потрошувачот, наместо потрошувачот да оди до производот, исплови на површина посебно во оваа криза.

Во кои канали на комуникација најмногу ќе инвестирате и зошто?

Каналите на комуникација во кои најмногу инвестираме периодов се многу тесно поврзани со каналите на продажба кои за нашите производи се дозволени за време на пандемијава. Ритеил каналот функционира, иако со приспособено работно време, па врзано со тоа, имаме добар дел инвестиции во трејд-маркетинг кои продолжија во овој канал.

Дигиталниот маркетинг е медиум кој повеќе ќе го поддржиме, затоа што преку него директно допираме до потрошувачите, кои периодов се најмногу во своите домови. Овој мехнизам на споделување на разни содржини, мислења за производите, најдобри искуства и слично се покажува клучен и за идните насоки кои ќе се преземаат за секој бренд поодделно.

Според некои размислувања, секоја криза создава и одредени шанси. Дали и каде гледате шанса за вашите брендови во оваа ситуација?

Верувам дека секоја криза, создава нови шанси... нови можности.. И лични, и деловни...

Секој од нас пред сè доби лична шанса, да го направи сето она, за што претходно му недостигало време. Да чита книги, да гледа филмови, да игра со своите деца, да има многу заеднички ручеци со своите најблиски, да се преиспита што сака ... каков е... што може поинаку... Односно шанса, сепак да признае дека и во најголемите кризи е засолнат во својот дом, со своите најблиски. Има многу кои со тоа не можат да се пофалат.

А кризата сигурно наметна низа прашања и кај брендовите. Верувам дека сите брендови си потврдија по кој знае кој пат,  дека секогаш треба да се подготвени на брзи приспособувања и дека потрошувачот бил и секогаш останува во фокусот на секоја нивна маркетинг и продажна стратегија. Мислам  дека кризата ни даде шанса на сите нас да ја разбереме јачината на онлајн-продажбата, која станува неопходен канал и сè повеќе зема замав. Потребата од стратегија со која производот ќе се носи до потрошувачот, наместо потрошувачот да оди до производот, исплови на површина посебно во оваа криза.