Свет

Десет клучни трендови во 2022 година и понатаму

28 јул 2022

Иако сознанијата и анализите во годинешниот извештај на „Мекинзи & компани“ се засноваат на ситуацијата пред инвазијата, во него се нагласени некои од клучните трендови што се очекува да влијаат врз моделите на потрошувачка

Извор: „Мекинзи & компани“, www.mckinsey.com

Во изминатите 24 месеци продажбата на прехранбени производи кај трговците достигна невидено ниво. Тоа, пред сè, се должи на ограничувањата на движењето на потрошувачите за време на пандемијата. Тој тренд почна да се менува во 2021 година со повторното отворање на рестораните и на границите, но следуваше пораст на инфлацијата и на цените на енергентите.

Инвазијата на Украина во февруари годинава предизвика дополнителен шок – поради улогите на Украина и Русија на пазарите на енергија, земјоделско-прехранбени производи и суровини, конфликтот се очекува да ги влоши негативните трендови што се појавија на крајот од 2021 година. Иако сознанијата и анализите во годинешниот извештај на „Мекинзи & компани“ се засноваат на ситуацијата пред инвазијата, во него се нагласени некои од клучните трендови што се очекува да влијаат врз моделите на потрошувачка.

Извештајот „State Of Grocery Retail“ е годишна глобална публикација која опфаќа три континенти – Азија, Европа и Северна Америка. Годинешниот извештај, „Навигација по спротивставените ветрови на пазарот – состојба на малопродажба на намирници 2022: Европа“, е продолжение на партнерството меѓу „Мекинзи & компани“ и „Еуро комерц“, создадено за на извршните директори да им обезбеди сеопфатен поглед на пазарот и идните трендови. За извештајот се анкетирани повеќе од 12.000 потрошувачи и околу 60 директори од цела Европа.

ЕКОНОМСКИ ВЕТРОВИ ОД СПРОТИВЕН ПРАВЕЦ

  1.  Намалување на волуменската продажба

Обемот на продажба кај трговците во текот на 2022 година најверојатно ќе се намали бидејќи се забележува опаѓање на влијанието на ковид-19.

Волуменската продажба во 2021 година се намали за 2,1 отсто во споредба со 2020 година. Во последните три квартали лани беше забележан пад на обемот, иако продажбата волуменски сè уште беше за 5,7 отсто повисока од 2019 година, оставајќи простор за понатамошен пад. Со оглед на високата стапка на инфлација, во иднина се очекува волуменската продажба да се стабилизира малку над вредностите од 2019 година, а приходите да останат јасно над вредностите од 2019 година.

Факт: Во 2021 година волуменската продажба е за 2,1% помала отколку во 2020 година (табела KPI, Еуропанел).

  1. Инфлација

Вкупната инфлација во Европа достигна 5,6 отсто, а цените на храната се зголемија за 3,5 отсто во јануари 2022 година. Украинската криза уште повеќе го зголемува инфлаторниот притисок. Општата инфлација го намалува расположливиот приход на потрошувачите на краток рок (и нивната доверба во иднината), а зголемувањето на цените на храната и високите трошоци за енергија директно влијаат врз маржите.

Од купувачите се очекува да ја намалат потрошувачката и да ја префрлат кон трговците со силна понуда на приватни марки.

Факт: 63% од извршните директори гледаат на инфлацијата како на врвен тренд во 2022 година (State of Grocery Europe, CEO-анкета – јануари 2022 година).

ОНЛАЈН

  1. Побавен пораст со подиференцирани понуди

Онлајн-порастот во 2022 година може да биде на пауза на многу пазари. Сепак, на среден рок, се очекува тој да продолжи. До 2030 година е-трговијата ќе сочинува повеќе од 20 проценти од пазарот, во зависност од земјата и сценариото.

Истовремено, онлајн-понудите ќе станат подиференцирани (инстант наспроти закажана испорака), опслужувајќи ги специфичните потреби на дополнителни сегменти на потрошувачи и мисии за купување. Потрошувачите сè повеќе ќе ја делат својата прехранбена кошница на повеќе од еден онлајн-играч.

Факт: Една третина од потрошувачите што купуваат онлајн на неделно ниво ги добиваат производите од три или повеќе играчи во е-трговијата (State of Grocery Europe, истражување за потрошувачи – ноември 2021 година).

ПРОШИРУВАЊЕ НА ПОЛАРИЗАЦИЈАТА

  1. Зголемување на ценовната чувствителност

Чувствителноста на цените се очекува дополнително да се зголеми во 2022 година, особено кај потрошувачите со пониски приходи, кои повеќе ќе се фокусираат на заштеда на пари (зголемување од 12% во споредба со минатата година). Тоа е силно поттикнато и од зголемениот инфлациски притисок.

Факт: Повеќе од половина од потрошувачите со ниски приходи (и 42 проценти од потрошувачите воопшто) планираат да бараат начини да заштедат пари додека купуваат (State of Grocery Europe, истражување за потрошувачи – ноември 2021 година).

  1. Висок квалитет по поволна цена

Потрошувачите што купуваат на нивоа на влезни цени се помалку подготвени да направат компромиси за квалитетот на овие производи. Досега, нивото на влезните цени се совпаѓаше со квалитетот на главните национални брендови на неколку пазари и категории. Тоа ја отежнува разликата меѓу нивото на влезна цена и нивото на основната цена.

За да се исполнат повисоките очекувања на потрошувачите, трговците можеби ќе треба да го подигнат квалитетот на приватните трговски марки.

Факт: 30% од извршните директори ги гледаат зголемениот квалитет и реинвенцијата на приватните трговски марки како важни трендови за 2022 година (State of Grocery Europe, CEO-анкета – јануари 2022 година).

  1. Засилена одржливост и фокус кон здравјето

Потрошувачите планираат повеќе да се фокусираат на здравата исхрана во 2022 година и да ги пренасочат трошоците кон поодржливи производи. Трендот првенствено е поттикнат од групите со високи приходи и од помладите генерации (милениумците и генерацијата Z). Речиси 40% од потрошувачите со високи приходи годинава планираат повеќе да се фокусираат на здравата исхрана.

За трговците тоа значи дополнително проширување на асортиманот на здрави и одржливи производи и зголемување на нивната видливост.

Факт: Порастот на продажбата на 10. бренда што најмногу ги купуваат еколошки ориентираните купувачи е за 15 процентни поени повисок од порастот на пазарот (Еуропанел).

  1. Пораст на премиум сегментот

Потрошувачите со високи приходи ја поттикнуваат побарувачката на поквалитетни, посвежи производи.

Освен тоа, купувачите се префрлаат и на други форми на нарачка за да го добијат нивото на свежина што го бараат – повеќе од 50% веќе купуваат од земјоделците, од пазарите за свежа храна или во независни пекарници и деликатесни продавници.

Факт: 20% од потрошувачите со високи примања планираат повеќе да купуваат премиум производи во 2022 година (State of Grocery Europe, истражување за потрошувачи – ноември 2021 година).

НОВИ НАЧИНИ ЗА ПРОФИТ

  1. Нови текови на приходите

Со оглед на притисокот врз основната дејност, многу трговци бараат нови начини за профит. Малопродажните медиумски мрежи, на кои трговците продаваат рекламен простор на компаниите користејќи ги податоците од картичките за лојалност за подобро таргетирање, се меѓу најперспективните нови извори на приходи.

Водечките играчи во САД изградија посебни единици за водење на нивната медиумска мрежа, постигнувајќи значителен придонес во нивниот ЕБИТ.

Факт: До 8% од онлајн-продажбата на водечките играчи во САД се постигнуваат преку малопродажни медиумски мрежи, со маржи од повеќе од 50% (анализа на „Мекинзи“).

  1. Персонализација и локализација

За да го достигнат следното ниво во персонализираните промоции, трговците би можеле да го прифатат пристапот „доживотна вредност на купувачот“. Притоа, купувачите се известуваат за вистинската понуда во вистинско време, со персонализирана порака преку вистинскиот канал. Резултатот може да биде добивка од 2 до 3 проценти во ЕБИТДА.

Факт: 23% од извршните директори го гледаат усвојувањето на апликациите за напредна аналитика како клучен приоритет (State of Grocery Europe, CEO-анкета – јануари 2022 година).

ЧОВЕЧКИ КАПИТАЛ

  1. Промена на моделот на вработените

Трговците се соочуваат со два клучни предизвици – голема побарувачка за нови вештини и улоги што е тешко да се покријат поради недостигот на достапни таленти, како и трошење на постојните вработени. Некои компании повторно ги замислуваат и редизајнираат улогите на вработените, со зголемување на фокусот кон нивните технолошки и социјални вештини.

За да транзитираат кон нов модел на вработени, компаниите можат да ја антиципираат идната побарувачка на таленти и да инвестираат соодветно (стратешко планирање на работната сила), искористувајќи ги преквалификувањето и усовршувањето како клучни извори за создавање вредност.

Факт: 39% од извршните директори го наведуваат ангажирањето на вистинските таленти како врвен тренд за 2022 година и гледаат зголемена потреба за преквалификација (State of Grocery Europe, CEO-анкета – јануари 2022 година)

tags:


@InStore.mk
Крадењето авторски текстови е казниво со закон. Преземањето авторски содржини (текстови и фотографии) од оваа страница е дозволено само делумно и со ставање хиперлинк до содржината што се цитира. 





Се вчитува следна вест...