Бизнисмените ќе можат онлајн да ѝ се пожалат на Владата

Владата апелираше до компаниите да аплицираат за мерките за поддршка на инвестициите и за субвенционирање на платите, а бизнисмените се пожалија на административните пречки што им оневозможуваат да работат.

Вака помина средбата во Стопанската комора на Македонија, на која вицепремиерот Кочо Анѓушев дојде да ги каже последните мерки за поттикнување на конкурентноста а излезе со ветување дека ќе организира канцеларија во која бизнисмените ќе можат онлајн да ги кажат проблемите и да бараат Владата да реагира.

Бавност на администрацијата, царинските процедури, долгт период на носење на законите, се само дел од проблемите кои ги посочија претставници на компаниите.  

Во производството не смее да има чекање и доцнење повеќе од седум дена. Во ред е ова што го прави Владата за да ни помогне, но има многу проблеми што не се решени. И да земеме поддршка од државата, како ќе ја искористиме кога се соочуваме со вакви тешкотии, рече Мирослав Ѓоргиовски од „Геопром“.

Имаше забелешки и за доцнењето на регулативата во земјоделството, за Законот за пасишта, кој оневозможува долгорочно планирање на инвестиции, а Анѓушев слушна и дека добро е да е субвенционира секундарното производство во земјоделството. 

Според анализата направена од Владата, 4.000 компании се квалификувани да аплицираат за државна поддршка за инвестиции.За мерката субвенционирано зголемување на плати, можат да аплицираат компаниите кои редовно исплаќаат плати.