Работење

Растителни масла: Можности за извоз на европскиот пазар

17 апр 2019

Европа е најголемиот увозник на растителни масла од целиот свет и е важна порта за глобалните дистрибутивни мрежи.

Извор: ЦБИ (Центар за промоција на увозот од земјите во развој)

Профилот на европски пазар на растителни масла се менува, отворајќи нови можности и предизвици за извозниците. Додека Источна Европа станува ветувачки пазар за пораст, Западна Европа покажува знаци на натамошно опаѓање. Сепак, специјалните масла им го привлекуваат вниманието на купувачите со повисок приход од западноевропските земји, диктирајќи го трендот за повисок квалитет и помали количества.

Алтернативите на растителните масла продолжуваат да прават притисок врз производителите. Тие се една од најважните сили што го обликуваат секторот на растителни масла. Освен тоа, во овој сектор мошне силно е и ривалството, така што од голема важност се воспоставените долгорочни односи со купувачите.

Традиционалните улоги на играчите во секторот растителни масла се менуваат. Присуството на големите мултинационални компании на пазарот сè повеќе се зголемува, што придонесува за засилување на конкуренцијата и заострување на барањата на пазарот. Зголемениот фокус на следливоста и одржливоста води до потребата за построга контрола во синџирот на снабдување.

Кои пазарни сегменти се вашиот таргет?

Растителните масла што се користат во прехранбената индустрија може да се поделат на два главни сегмента:

  1. Преработувачка индустрија: растителните масла се користат како состојки за полупроизводи или за финални прехранбени производи, како што се маргарин, кондиторска маст, пекарски или слатки производи.
  2. Индустрија за преработка и производство на масло: растителните масла се пакуваат како финални производи (за готвење, пржење или за салати).

Во рамките на овие два сегмента, растителните масла може понатаму да се делат на стоковни и на специјални производи. Стоковниот сегмент ги опфаќа производите со кои се тргува со поголеми количества и по пониски цени, додека специјалниот ги опфаќа производите со кои се тргува со помали количини и по повисоки цени, како што се премиум и сертифицираните производи (органски, фер трговија).

За да бидат дозволени на европскиот пазар, безбедноста на храната е основа на сите законски и дополнителни барања за растителните масла. Барањата за обележување исто така заслужуваат посебно внимание, особено за извозниците на готови производи.

Совети за наоѓање купувачи на европскиот пазар на растителни масла

Европа е најголемиот увозник на растителни масла од целиот свет и е важна порта за глобалните дистрибутивни мрежи. Сепак, не е секогаш лесно да го идентификувате и да стапите во контакт со вистинскиот купувач. Во продолжение се неколку совети што ќе ви помогнат во тој процес.

  1. Запознајте го вашиот таргет-пазар

Иако Европа е најголемиот светски увозник на растителни масла, таа може да биде тешко достапна. Затоа е неопходно најпрвин да ја запознаете структурата на целниот пазар. Поставете си ги следниве прашања:

  • Кои пазари и канали нудат најдобри можности за вашиот производ?
  • За што се користи вашиот производ? Како состојка за понатамошна обработка или како готов производ за консумација?
  • Кои се главните увозници на вашиот производ и какви се барањата на купувачот?
  • Колкава е побарувачката за вашиот производ по земја?

Неопходно е да ја оцените и конкуренцијата и да ја препознаете вашата конкурентска предност. Сите овие аспекти ќе ви овозможат добро да го спознаете целниот пазар и ќе ви помогнат да ги пронајдете вистинските купувачи. Кога станува збор за продажните канали, мора добро да размислите што е најсоодветно за вас: директна продажба до крајниот корисник, преку увозници и трговци или преку агенти и брокери.

  1. Следете ги веб-страниците на секторските федерации и здруженија

ФЕДИОЛ е европска федерација посветена на пазарот за растителни масла, чии членки се национални здруженија на мелници и преработувачи на масло од 17 земји на ЕУ. На веб-страницата на ФЕДИОЛ може да најдете членови од различни нивоа на европскиот пазар, вклучувајќи трговци, мелници, преработувачи и производители. Ова е добро место за потрага по потенцијални купувачи.

Онлајн-листи на членовите објавуваат и други национални и специфични здруженија за секторот во различни европски земји. На пример, германското секторско здружение ОВИД наведува листа од 20 компании-членки, во која се вклучени мелници, како и компании за купување и транспорт на растителни масла.

Треба да ги побарате секторските асоцијации во земјите во кои има најголема побарувачка за вашите производи. Понатаму, од витално значење е да ги следите и релевантните трговски публикации за секторот растителни масла, како што се: „Оил ворлд“ и „Оилс енд фатс интернационал“.

  1. Учествувајте на саеми

Учеството на трговски саеми е одличен начин да ги сретнете потенцијалните купувачи и да добиете информации за пазарот. Повеќето европски купувачи на растителни масла одат на саеми за трговија, како што се „Фуд ингредиентс“, „Оилс енд фатс“, „Ануга“, „Биофах“ и СИАЛ, во потрага по потенцијални трговски партнери.

Трошоците за изложување на саемите може да бидат високи. Ако немате буџет или не сте подготвени да учествувате како изложувач, тогаш може да присуствувате како посетител.

  1. Контактирајте ги организациите за промоција на трговијата

Поголемиот дел од европските земји имаат (не)владини организации што промовираат увоз од земјите во развој. Тие обично соработуваат со мали и средни претпријатија и можат да ви помогнат при извоз на вашите производи во Европа. Најдете организација што се фокусира на вашата земја и производи.

Исто така, размислете за контакт и со амбасади (или трговски аташеи) во вашата земја, во ЕУ или со локалните европски стопански комори.

  1. Искористете ги програмите за поврзување

Учеството во програмите за меѓусебно поврзување и во трговските мисии може да биде добар начин за запознавање нови пазари и за развивање контакти со потенцијални увозници. Многу земји организираат трговски мисии за промоција на нивните извозни сектори. Приклучувањето кон ваквите посети може да биде ефикасен начин за проширување на вашата мрежа. Кога размислувате за учество во некоја програма, добро проверете дали вашиот производ е една од фокусните области. Во спротивно, учеството може да биде губење време.

  1. Следете ги веб-страниците на трговците

Европските купувачи претпочитаат директен контакт со снабдувачите. Тие, исто така, сакаат да направат детална процена на потенцијалните доставувачи пред да склучат договори. Веб-страниците на трговците може да ви овозможат пристап до помалку традиционални пазари, а може да ви овозможат и да промовирате одредени производи, како на пример, синапово масло или масло од авокадо. Ова е особено корисно ако немате голем буџет за маркетинг.

Регистрирајте ги и објавете ги деталите и производите на вашата компанија онлајн. На неколку трговски веб-страници ова е бесплатно. Некои контакти можат да бидат од голема вредност за вашиот бизнис. Проверете ги следниве веб-страници: Foods for Trade, The Food World, Organic-Bio, Go4WorldBusiness, Tradekey и др.

  1. Користете директни маркетинг-методи

Пишувањето е-пораки директно до потенцијалните купувачи е добар начин за нови перспективи. Приспособете ги вашите пораки на поединечните барања на секоја компанија. Објаснете ги следните ставки во писмената комуникација, по што упатете и телефонски повик:

  • Кои сте?
  • Зошто се поврзувате со купувачот?
  • Што продавате? Кои се спецификациите на производот?
  • Како управувате со квалитетот?
  • Кои количества ги нудите?
  • Како ќе ги испорачате производите?
  • Каде и кога може да ги испорачате?
  • Зошто треба да купи од вас?
  1. Разберете ги потенцијалните купувачи

Пред да контактирате со потенцијалните купувачи, треба добро да се подготвите. Важно е да го разберете секој поединечен купувач, како и неговите барања. Купувачите во секторот растителни масла секојдневно добиваат повици и е-пораки од потенцијалните доставувачи. Тоа значи дека ќе треба да ги убедите за вашите производи и услуги.

Посетете ја веб-страницата на компанијата што сакате да ја контактирате и вооружете се со што е можно повеќе информации. За поопшти информации, обидете се да ги истражите европските купувачи и да дознаете што тие очекуваат. Бидете во тек со новините во водењето бизнис во Европа. Добрата подготовка ќе ви помогне во контактот со европските купувачи и во воспоставувањето долгорочни деловни односи со нив.



@InStore.mk
Крадењето авторски текстови е казниво со закон. Преземањето авторски содржини (текстови и фотографии) од оваа страница е дозволено само делумно и со ставање хиперлинк до содржината што се цитира. 





Се вчитува следна вест...